Samdi 7 fevriye 2026 la, make fen manda 9 manm Konsèy Prezidansyèl Tranzisyon yo. Nan sans sa a, yon seremoni ofisyèl dewoule nan « Villa d’Acceuil », an prezans divès manm nan gouvènman an, Premye minis Alix Didier-Fils-Aimé, otorite nan yo Lapolis, Lame ak manm kò diplomatik la.
Avèk seremoni sa a, KPT a ofisyèlman pa egziste ankò, e se sèl Fils-Aimé ki rete kòm responsab nan tèt leta a. Manm KPT yo ale, aprè 22 mwa yo pase kòm manm pouvwa egzekitif la. Pou anpil obsèvatè, manm KPT yo kite dèyè yo, yon bilan jesyon « katastwofik ».
Kèk èd tan aprè, Alix Didier Fils-Aimé dirije premye konsèy minis li. Pandan konsè minis ekstraòdinè sa a, desizyon pran pou revoke Minis Ekonomi ak Finans lan Alfred Fils Metellus. Nap raple, Alfred se te minis ki te presanti pou te vin ranplase Fils-Aimé kòm Premye minis lan, si KPT a te revoke li.
Pou kounya, se Fils-Aimé ki okipe pòs Minis Finans lan « pwovizwaman ». Daprè yon sous pwòch Primati, gen divès lòt chanjman ki ta dwe fèt, pa egzanp nan konsèy minisipal yo.
Sous/Passion Info Plus
Foto/Primature Haiti
