Se yon mobilizasyon san parèy. Chak jou, se yon lòt defi pou yon pakèt Ayisyen, ki jire fòk Ariana chanpyon nan 8e Edisyon “House of challenge” lan, kap dewoule nan peyi Togo, an Afrik. Soti nan jwèt sou tab, pase nan dans, match fas a fas sou TikTok… chak jou pote pwòp sispens pa yo.
Sou rezo sosyal yo, Ayisyen tout laj, tout sektè, tout klas, pa deside rate yon match. Dèyè telefòn yo, yap sipòte fason yo kapab, pou pouse jèn enfliyansèz la rive jis nan final. Nan match fas a fas yo, sipòte yo pa neglije voye kado ki evalye a plizyè milye dola, chak jou. Si genyen kap voye kado, gen lòt kap tapote, san rete. Pou Ayisyen sa yo, “House of Challenge” se plis ke yon senp konkou, se yon vitrin pou vann listwa ak kilti peyi Dayiti, se montre kiyès nou ye.
Aprè chak jounen, ti bout videyo jwèt yo viral sou tout rezo. Kòmantè ak mo ankourajman yo anpil. Menm entènot Afriken pa sispann salye nivo solidarite ak pèseverans pèp Ayisyenan , kap pouse Ariana san gade dèyè. Avèk pawòl Ariana souvan ap lanse pandan match yo konsènan Ayiti, gen anpil moun ki wè ladan yo, yon sans angajman patriyotik, ki vin bay konkou sa yon lòt sans ane sa.
Nap presize, pou jounen jedi 9 avril 2026 la, Ariana Milagros Lafond toujou kenbe tèt klasman an avèk 2,300 pwen. Dèyè li gen MK Michelle pou peyi Kamewoun 2,145 pwen, epi an twazyèm pozisyon se Sheisnaissa pou Mali, avèk 1,945 pwen.
Pou kounya, konkou a nan faz final. Demi-final yo ap kòmanse jodi jedi 9 avril 2026 la, epi grand final la 11 avril 2026. Anpil Ayisyen di yap kontinye kanpe dèyè Ariana, e yo rete kwè se li kap ranpòte lamayòl.
