Toronto, Kanada. 30 Mas 2026. Ekip nasyonal foutbòl la nan kan konsantrasyon, avan match amikal yo kont Tinizi ak Islann. Nan koulwa rantre a, yon fanm kanpe. Jwè yo ap avanse sou li youn aprè lòt pou vin salye l. Akolad, souri, ti pawòl motivasyon ak ankourajman… ou pata di se yon Manman kap pale ak pitit li. Nan fason pa l, Monique André, 4 mwa aprè dènye rasanbleman ki te make listwa, tap montre ekip la yon lòt fwa ankò, li la avè yo, li la pou yo.
Amoni ant Prezidant Komite Nòmalizasyon Federasyon Ayisyèn Foutbòl la ak jwè seleksyon nasyonal yo, yon bagay plizyè moun ki pwòch federasyon an di nou ki enstale depi aprè Mme André fin pran fonksyon sa a. Yon amonizasyon ki ogmante konfyans ekip la, kap prepare pou al patisipe nan mondyal, aprè 52 lane yo pat patisipe nan konpetisyon sa a.
Depi lè Monique André pran tèt foutbòl Ayisyen an depi novanm 2024, anpil konpatriyòt pa sispann felisite travay li. Soti nan U-17, U-20 rive nan senyò… kèlkeswa kategori, fanm kou gason, temwanyaj yo montre piblik Ayisyen an gen anpil apresyasyon pou Mme André, yo prezante kòm yon fanm solid, ki jwe gwo wòl nan mete foutbòl la kote li ye jodi a.
Yon lòt kote, Mme André jwenn kredi kòm Prezidant ki rive konvenk anpil jwè entènasyonal pou vin jwe pou Ayiti. Soti nan Wilson Isidor (Sunderland, Angletè), Jean Ricner Bellegarde (Wolverhampton, Angletè), Josué Casimir (AL Auxerre, Lafrans), Hannes Delcroix (FC Lugano, Laswis)
Sou plan kominikasyon vizyèl, federasyon an fè anpil pwogrè, depi lè Mme André rive nan pòs sa a, daprè sa anpil obsèvatè fè konnen. Selon konsta yo, foto ak videyo seleksyon yo, sitou senyò a, pi pwòp, pi bèl. Yon evolisyon ki, daprè anpil Ayisyen, fè etranje wè ekip la yon lòt fason.
Avèk prezans Mme Monique André, gen yon konfyans ak estabilite ki vin etabli anndan federasyon an, sa ki fè jwè ki te deja la, ak lòt ki potko vini yo, santi gen plis sans òganizasyon ke avan. Selon sa sèten jounalis espòtif Ayisyen, jan federasyon an ap fonksyone kounya, pèmèt plizyè jwè entènasyonal ki te ezite, vin jwe pou Ayiti finalman.
Nap raple, se FIFA ki te mete Komite Nòmalizasyon sa a nan tèt federasyon an nan lane 2021, aprè eskandal ki te enplike ansyen Prezidan FHF la Dadou Jean-Bart. Komite sa gen pou misyon, restriktire federasyon Ayisyèn Foutbòl la, epi òganize eleksyon pou yon komite egzekitif lejitim.
