Li rele Jean Jacques Rolando. Li gen 24 lane. Lap viv Jakmèl. Si w sou rezo sosyal Ayisyen an, li difisil pou w pa tonbe sou videyo li, oubyen tande vwa l nan yon videyo “challenge”. “Manti ! Nou pap pran may sa FAKE ! Pa ba nou may sa felikè…”, pawòl sa a toujou nan tout videyo li yo, pou dekri konpòtman divès kategori moun nan sosyete a.
Nan yon echanj nou te genyen ak jèn komedyen Ayisyen an, li fè nou konnen lap fè modèl videyo sa yo depi janvye 2026. Fas ak reyaksyon odyans lan, Rolando tout moun konnen sou non RJ Focus sou tout rezo yo, kontinye fè menm videyo sa yo, e kapte atansyon anpil moun.
Chak videyo li, tradui oubyen dekri yon reyalite nap viv chak jou nan sosyete a. Sèten moun toujou wè nan videyo l yo, yon mwayen pou retounen sou yon seri konpòtman oubyen abitid Ayisyen renmen afiche nan fonksyon yo chak jou.
Jean Jacques Rolando di li swete videyo li yo pa sèlman fè moun ri, men yo ka gade reyalite sosyal ak kiltirèl yo an fas, epi kreye fason pou kontinye viv ansanm. Chapo RJ Focus. Kontinye vanse…
