Yon gwo dram rive nan Citadelle Henry, nan zòn Bonnet-à-l’Évêque, samdi 11 avril 2026 la. Sa rive aprè yon bourara ki ta pral pwovoke malèz nan yon foul moun ki te vin patisipe nan yon fèt tradisyonèl sou sit istorik la.
Se Direktè Depatman Pwoteksyon Sivil la Jean Henry Petit ki konfime enfòmasyon an, e fè konnen bilan sa toujou rete pwovizwa, e kapab vin pi lou akoz kantite moun ki disparèt. Plizyè dizèn moun ki blese, ap pran swen pou kounya nan diferan lopital nan rejyon an.
Daprè premye eleman enfòmasyon ki soti bò kote otorite lokal ak pwoteksyon sivil, kantite moun ki te sou sit la te depase sa yo te prevwa, sa ki te kreye yon presyon ki fè yo pat ka metrize l.
Selon sa jounal Le Nouvelliste rapòte, te gen fay nan òganizasyon evènman an, sa ki te kontribye a trajedi sa a. Se yon sèl pòt aksè ki te itilize pou kontwole valè moun ki tap rantre epi soti nan espas la, sa ki pwovoke malèz kay patisipan yo. Rapidman, te vin genyen yon bourara ki eklate nan mitan moun yo, ki tap chache kite espas la, pandan gen lòt ki tap chache rantre.
Mouvman panik sa a te pwovoke yon gwo lese frape, sa ki pral fè moun ki tap patisipe nan evènman an pat ka respire, youn tap mache sou lòt, epi gen lòt ki te pèdi konesans nan foul la. Anplis de sa, gen plizyè aksidan sikilasyon ki fèt aprè, nan moman kamyon ak motosiklèt tap transpòte sèten viktim lopital. Sa ankò vin fè bilan an vin pi lou.
Daprè sa Nouvelliste rapòte, lopital Sacré-Cœur nan Milot resevwa plizyè kò jèn fi ak jèn gason yo te pote an ijans, san okenn lespwa yap ka jwenn swen. Pwoteksyon sivil pale de 30 mò, men selon temwanyaj medya a di li jwenn sou plas, kantite viktim yo kapa rive jiska 70, menm si chif sa yo pa ofisyèl.
Anpil moun ap mande pou gen yon ankèt ki louvri, pou konnen kijan sa fè pase.
Sous/Le Nouvelliste.-
