Kèk jou aprè gouvènman Ayisyen an fin anonse ogmantasyon pri gaz la sou mache a, sitwayen kap viv nan Delmas ak zòn ki antoure l yo, lanse lendi 6 avril 2026 la, yon mouvman pwotestasyon, pou di yo pa dakò ak desizyon sa a. Barikad, kawotchou kap boule, machinn ki kanpe an kwa nan mitan lari, pwotestatè yo itilize tout mwayen pou fè pase revandikasyon yo.
Yon sitiyasyon ki te lakoz gen gwo tansyon nan divès kote, espesyalman. devan Anbasad Kanada an Ayiti. Nan zòn tankou Wout Frè, Djoumbala… te gen mouvman pwotestasyon tou ki te siyale, toujou nan objektif pou di NON ak monte pri gaz la.
Sitwayen sa yo voye jete desizyon gouvènman Alix Didier Dils-Aimé, e fè konnen salè minimòm yap resevwa pa pèmèt yo pete machin pou al travay, paske pri tout kous yo monte.
Anplis de bloke lari, sitwayen yo lanse yon operasyon fèmen ponp gaz sou wout Delmas, pou eksprime fristrasyon yo. Pwotestatè yo te menm fòse machin transpò piblik kap soti Petyonvil yo pou mete tout pasaje atè. Chofè moto yo yo menm tou rantre nan mouvman, pou di yo pa dakò ak ogmantasyon pri gaz la.
Nap siyale, te gen prezans Lapolis nan divès zòn kote ki te gen mouvman pwotestasyon yo, nan lide pou evite derapaj.
Sous/Passion Info Plus.-
