Gang ki fè pati baz « Gran Grif » nan Savien, atake epi touye plizyè sitwayen nan lokalite Jean-Denis, ki twouvel nan zòn Ti Rivyè (Latibonit), nan lannwit samdi 28 pou louvri dimanch 29 mas 2026 la. Aprè nouvèl atak tèt chaje sa a, poko gen yon chif ofisyèl sou kantite moun ki mouri vrèman.
Si sèten otorite lokal yo pale de 70 mò pou pi piti, lapolis bò kote pa l pale de 16. « Mwen jwenn enfòmasyon ki fè mwen ka di, gen 70 moun ki mouri. Sepandan, gen plis viktim pase sa. Gen moun ki rete bloke anndan lakay yo, ak lòt espas ankò », se sa Derniella Josep, KAZEK lokalite Jean-Denis an deklare nan jounal « Premye Okazyon » sou Radyo Televizyon Karayib.
Bò kote pal, Majistra Ti Rivyè a fè konnen se 16 moun ki mouri, epi 10 lòt blese. Dort Lereste di li avanse chif sa yo, sou baz konsta ki fèt nan mòg lopital. Se menm chif sa a responsab yo nan Lapolis nasyonal bay, nan yon kominike yo pibliye maten lendi 30 mas 2026 la.
Pandan li toujou difisil pou gen yon bilan egzat de atak sa a, enfòmasyon ki disponib montre, kantite viktim ki anrejistre yo kapab plis ke sa. Nan videyo kap sikile sou rezo sosyal yo, nou ka remake yon seri sèn tèt chaje, kote kadav epapiye atè nan lari, tras san, epi divès kay ki boule ra-pye-tè.
Sous/Passion Info Plus, AP, RTVC.-
