Jèn Ayisyèn Abigaïl Alexandre soti loreya final “Internationale Eloquentia 2026”, nan peyi Lafrans. Jèn Jakmelyèn 21 lane a resevwa pri sa a, nan kad yon seremoni ki fèt nan “La Seine Musicale”, nan vil Paris, mèkredi 25 mas 2026 la, an prezans 4,000 moun ki te fè deplasman.
Abigaïl chanpyon pami 2,400 kandida ki te patisipe, avèk pledwari li ki te fèt sou entèlijans atifisyèl. “L’IA creuse-t-elle les inégalités ?”, se sou tèm sa jèn demwazèl la te pran lapawòl, e te kapte atansyon tout piblik la, nan fason li pale, e devlope sijè a.
Internationale Eloquentia, se pi gwo konkou elokans frankofòn. Abigaïl se premye Ayisyèn ki rive nan nivo sa nan kokennchenn konpetisyon sa a, ki kreye an 2012, pou selebre kesyon “moun kap pran lapawòl an piblik”.
Aprè distenksyon sa a, felisitasyon ak aplodisman yo soti tout kote. Divès enstitisyon ak antite tankou Anbasad Ayiti an Frans, Eloquentia Jakmèl ak Pòtoprens, MEnpakte, Golden Team Haiti, san konte Ayisyen ak Ayisyèn sou rezo sosyal yo, ki voye gwo kout chapo pou jèn fanm sa a, ki fè valè peyi a.
Abigaïl Alexandre ta dwe retounen an Ayiti, mèkredi 1e avril kap vini la.
Sous/Passion Info Plus.-
