Divès patnè ki enplike nan finansman eleksyon jeneral 2026 yo an Ayiti, kòmanse mobilize. Nan sans sa a, yon gwo rankont estratejik òganize lendi 23 mas 2026 la nan Pòtoprens, kote Premye minis Ayisyen an Alix Didier Fils-Aimé fè prezantasyon bidjè a.
Divès aktè tankou Konsèy Elektoral Pwovizwa, reprezantan Sekretè Jeneral Nasyonzini, patnè teknik ak finansye tankou PNUD, UNOPS ak OEA, yo tout te patisipe nan seremoni prezantasyon sa a. Reyinyon sa a, daprè sa Primati presize, rantre nan kad travay “Task Force” nasyonal sou eleksyon yo, e li montre tou detèminasyon otorite nasyonal yo pou mennen peyi a sou wout eleksyon lib, enkliziv, kredib epi transparan.
Pandan rankont lan, Premye minis lan salye angajman kominote entènasyonal la bò kote leta Ayisyen, pandan lap renouvle priyorite li di li bay a retablisman lòd konstitisyonèl. Alix Didier Fils-Aimé te pwofite raple ke gouvènman an ap pran responsablite pou garanti kondisyon nesesè yo reyini pou bon dewoulman egzèsis sa a.
