Pati politik “Alliance pour une Société sans Exclusion – ASE”, fè yon vizit samdi 14 mas 2026 la, nan komin Tomasik, depatman Sant. Pandan vizit sa a, plizyè reprezantan Direktwa Nasyonal la te prezan.
Nan okazyon an, Prezidan pati a ansyen depite Ennery, Cholzer Chancy, te patisipe nan yon rankont echanj ak divès manm nan popilasyon lokal la. Aktivite sa a òganizasyon OJUDT te reyalize, te fèt nan lide pou etabli yon dyalòg ouvè sou enkyetid kominote a, defi yap fè fas nan komin nan, epi pèspektiv devloman pou rejyon an.
Pandan rankont lan, patisipan yo te pwofite pataje lide ak atant yo konsènnan avni peyi a. Prezidan pati ASE a renouvle angajman li pou toujou tande sitwayen yo, epi ranfòse kolaborasyon ak diferan òganizasyon kominotè, estrikti lokal ak fòs viv nasyon an.
Vizit sa a fèt nan yon kontèks kote divès pati politik ap souke kò yo, epi pran yon seri inisyativ pou eseye rapwoche popilasyon an, nan pèspektiv pwochèn eleksyon yo an Ayiti.
