Se yon veritab demonstrasyon fòs. Depi 28 fevriye 2026, aprè Etazini ak Izrayèl fin atake Iran, epi touye lidè siprèm Iranyen an Ayatollah Ali Khamenei, chak kan ap bay frap, sible zòn estratejik, voye dwon, devye dwon, eksplozyon pasi pala… lis viktim yo ap ogmante.
Daprè ONG “Croissant-Rouge” Iranyèn, gen pou pi piti 555 moun ki mouri nan peyi Iran, e gen 131 vil ki touche. Nan Izrayèl, yo rapòte gen 11 moun pou pi piti ki mouri.
Pandan tout sa yo ap rive, peyi Iran deklare yo pap negosye. Yon ofisyèl Iranyen di, Etazini franchi yon limyè wouj, lè yo touye lidè siprèm yo a. Paralèlman, responsab yo nan Pentagon fè konnen gè a ka dire plis tan, avan yo atenn objektif yo nan kad operasyon sa a ki rele : « Epic Fury ». Yon operasyon ki pa san konsekans, paske Etazini anonse yo deja pèdi yon total 4 sòlda.
Si Etazini ak Izrayèl se yo ki devan, gen divès alye yo kap pran pozisyon. Chak peyi ap fè menas, nan ka teritwa yo oubyen teritwa alye yo ta touche. Men jiskaprezan, poko gen yon alye Iran ki pran yon pozisyon klè, piblikman.
Jiska Lendi 2 Mas 2026 la, frap misil balistik yo ap kontinye, e se tout rejyon Mwayen-Oryan an ki an alèt. Avyon pa vole nan zòn konfli yo, ak lòt espas ki nan antouraj yo. Anpil pasaje bloke.
Yon lòt kote, pri petwòl la gentan ap ogmante sou mache entènasyonal la. Konfli sa a anpeche acha ak sikilasyon gaz fèt, sa ki pral gen konsekans sou anpil peyi nan mond lan. Daprè sa plizyè medya rapòte, gen yon rafinri petwòl nan peyi Arabie-Saoudite, ki se youn nan pi gwo ki gen nan mond lan, ki sibi domaj pandan atak Iranyèn yo, menm si se limite.
Nap siyale, aprè lanmò lidè siprèm Iranyen an, repiblik islamik lan anonse 40 jou dèy, epi 7 jou ferye. Annatandan, gen yon nouvo lidè siprèm enterimè ki deja ranplase l, ki rele Ayatollah Alizera Arafi.
Sous/RFI, CNN, NBC News.-
