USCIS di yo okouran de òdonans Jij Ana Reyes pran pou bloke desizyon yo a, men yo fè konnen yo pa dakò. Menm si yo konteste òdonans lan, sèvis imigrasyon amerikèn anonse nan yon alert yo pibliye sou sit ofisyèl yo, estati benefisyè TPS yo rete menm jan an, e tout kat travay anba TPS toujou rete valid jiska nouvèl òd.
Paralèlman, administrasyon Trump lan pa pèdi tan, yo gentan pase a laksyon. Ofisyèlman, yo fè apèl de desizyon jij la, devan Lakou Dapèl nan Washington, jedi 5 fevriye 2026 la, pou konteste òdonans Jij Ana C. Reyes te pran an. Avi dapèl sa a avoka Dhruman Y. Sampat siyen, sou otorite pwokirè Jeanine Ferris Pirro, konteste òdonans lan, men tou opinyon jij la. Gouvènman an pa rete la, yo egzije pou jij la retrakte sou òdonans li te pran pou pwoteje Ayisyen ki sou TPS yo, deside sou li avan lendi, sinon, yo menase pou yo sezi Lakou Siprèm.
Yon lòtbò, Lakou dapèl deja anrejistre, jodi vandredi 6 fevriye a, depo avoka gouvènman an fè sou dosye TPS la. Avoka gouvènman mande on desizyon an ijans, 9 fevriye oubyen anvan sa. Men kou dapel pwograme 9 Mas pou tout pati yo soumèt dokiman nesesè yo.
Sous/CTN
Foto/AI LSV Media
