Se yon pèfòmans ki pral make istwa Super Bowl la. Soti nan kòmansman jis rive nan finisman, espektak la te chaje ak mesaj politik. Dekò, abiman, drapo diferan peyi nan Amerik Latin ak Karayib la ki tap flote pami yo Ayiti, Bad Bunny voye yon mesaj pou di, tout peyi sa yo ansanm se « Amerika ».
Anplis de sa, atis Potoriken an ki sot pran « Grammy Awards » ane sa a, voye yon mesaj lanmou. « Sèl bagay ki pi puisan ke RAYIMAN, se LANMOU », se sa nou te ka li nan yon gwo afich ki te anlè stad la.
Trump fache…
Pèfòmans sa a ki te fèt eksklizivman an espanyòl, pa fè Donald Trump plezi. Touswit aprè, Prezidan ameriken an reyaji, li di : « Espektak la vrèman terib, youn nan pèfòmans ki pi mal nan tout istwa Super Bowl. Se yon derespektan pou Grandè Amerik la. Li pa reprezante estanda nou yo an tèm de siksè, kreyativite, oswa ekselans », se sa Trump ekri sou platfòm rezo sosyal li, « Thruth Social ».
Chèf leta a fache, li di pèsonn pa konprann yon mo nan sa Bad Bunny tap di, epi dans yo te « degoutan ».
Nap raple, nan seremoni Grammy Awards ane sa, atis Pòtoriken an te eksprime klèman dezakò li pou jan gouvènman an ap aplike politik imigrasyon nan peyi a.
Sous/ABC News, NBC News
Foto/AP, Getty Images
